Mukofot muborak aziz ustozlar

O‘zbekiston Respublikasi Prezidentining Farmoniga muvofiq, mamlakatimiz ma’naviy-ma’rifiy salohiyatini yuksaltirish,yosh avlodni ona Vatanga muhabbat, istiqlol g‘oyalariga sadoqat, milliy va umuminsoniy qadriyatlarga hurmat ruhida sog‘lom va barkamol voyaga etkazishga qo‘shgan salmoqli hissasi, ularga fan asoslarini hamda zamonaviy kasb-hunarlarni o‘rgatishdagi jonkuyarligi, ta’lim-tarbiya sohasidagi ko‘p yillik samarali mehnati va jamoat ishlaridagi faol ishtiroki uchun bir guruh ustoz murabbiylarga davlatimizning faxriy unvonlar berildi, ularning qatorida ko‘plab Samarqandlik o‘qituvchilarni uchratish mumkin. Quyida ana shu unvon olgan samarqandlik ustozlar ro‘yxati bilan tanishing;

Toshbaev Botir Ochilbaevich - Payariq transport kasb-hunar kollejining maxsus fan o‘qituvchisi, Samarqand viloyati

Mardanov Abdumo‘min Davurovich - Qo‘shrabot tumanidagi 13-umumiy o‘rta ta’lim maktabi direktorining o‘quv-tarbiyaviy ishlar bo‘yicha o‘rinbosari, Samarqand viloyati

Gafarova Maxfuza Boltaevna - Samarqand turizm va maishiy xizmat kasb-hunar kollejining ishlab chiqarish ta’limi ustasi, Samarqand viloyati

Berdikulov Anvar Otakulovich - Ishtixon maishiy xizmat kasb-hunar kollejining maxsus fan o‘qituvchisi, Samarqand viloyati

Kamalova Dilarom Tuvalovna - Jomboy tumanidagi 20-umumiy o‘rta ta’lim maktabining fizika fani o‘qituvchisi, Samarqand viloyati

Maxsudova Maxfiza Bakoevna - Samarqand shahridagi 5-umumiy o‘rta ta’lim maktabining fizika fani o‘qituvchisi, Samarqand viloyati

Uroqova Nafisa Sharofiddinovna - Samarqand tibbiyot kollejining maxsus fan o‘qituvchisi, Samarqand viloyati

 

 

Samarqand xalqaro musoboqa mezboni

Samarqand "Baydarkada va kanoeda eshkak eshish” bo‘yicha navbatdagi Osiyo chempionatiga mezbonlik qilmoqda. Ushbu nufuzli birinchilikda Osiyoning 24 mamlakatidan 450 nafarga yaqin sportchilar ishtirok etishmoqda.

Nufuzli ushbu musobaqaga o‘zgacha hozirlik ko‘rildi. Uni yoritib borish uchun chet mamlakatlardan zamonaviy texnik uskunalar, elektron tablolar keltirildi. Bir so‘z bilan aytganda joriy yilgi birinchilikka o‘zgacha tayyorgarlik ko‘rildi. Kuni kecha musobaqaning ochilish marosimi bo‘lib o‘tdi.

Yapon talabalarining hayrati cheksiz

Yapon talabalarining hayrati cheksiz Samarqand davlat iqtisodiyot va servis institutida samarqandlik talabalarning yaponiyalik yoshlar bilan uchrashuvi o‘tkazildi. Yponiyaning turli oliy ta’lim muassasalarida tahsil oladigan bu yoshlar uchrashuv davomida o‘zlari o‘qiydigan oliygoh, istiqomat qiladigan shahar haqida ko‘rgazmali vositalar orqali so‘zlab berishdi.

O‘z navbatida samarqandlik talabalar ham tengdoshlariga mamlakatimiz milliy qadriyatlari, bayramlari, ta’lim tizimi xususida ma’lumot berdilar. Simpozium yakunida faol qatnashgan talabalar maxsus sertifikatlar bilan taqdirlanishdi. Shuningdek, yoshlar Samarqandning tarixiy obidalari, diqqatga sazovor joylarini ham tomosha qildilar. – Samarqandga birinchi bor kelishim, – deydi yaponiyalik talaba Amami Nakagana. – Bu erdagi obod yo‘llar, ko‘rkam binolar, ayniqsa, tarixiy obidalar bizni hayratga soldi. Bu erning mehmondo‘st xalqi menga juda yoqdi. Imkonim bo‘lsa Samarqandga yana kelaman.

Bir kelib keting Payariq tomonga

Bugun viloyatimizning nafaqat shahar, qaysi bir tuman yoki qishlog‘ida bo‘lmang keng miqyosdagi bunyodkorlik, obodonlashtirish ishlari amalga oshirilayotganligini ko‘rasiz. Ayniqsa, tuman markazlarida barpo etilayotgan bir-biridan ko‘rkam va zamonaviy inshootlar bu erda istiqomat qilayotgan yurtdoshlarimizga qulaylik yaratish bilan birga, ularning madaniy xordiq chiqarishlari uchun sharoitlar yaratmoqda. Payariq tumanida yangi istirohat bog‘ining ochilishi ham tuman ahli quvonchiga sabab bo‘ldi.

Prezidentimiz aytganidek, obodlik ko‘ngildan boshlanadi. Ko‘ngli obod inson o‘z yurtini bog‘u bog‘zorga, gulu gulzorga aylantiradi. Bugun Samarqand viloyatiga tashrif buyurgan har qanday inson bunga ishonch hosil qiladi. Bu qadim yurtda ko‘ngli obod, bunyodkor odamlar yashamoqda, mehnat qilmoqda, kelajak poydevorini qo‘ymoqda. Shuni alohida faxr ta’kidlab o‘tish lozim, o‘tgan yillar davomida Samarqandda yaratuvchanlik va ulkan bunyodkorlik ishlari amalga oshirildi. Natijada viloyatning barcha shahar va tumanlarida ham bu boradagi ishlar ko‘lami kengayib, tuman markazlari hamda qishloqlar tobora ko‘rkam qiyofa kasb etib bormoqda. Viloyatning Payariq tumanida ham ijobiy ishlar bajarilmoqda. Eng ulug‘ va eng aziz bayram — Vatanimiz mustaqilligining 22 yillik shodiyonalari kunlarida tuman markazida istirohat bog‘i aholi ehtiyoriga topshirildi. Bir vaqtlar qarovsiz va xarob holda yotgan ushbu maskan bugun har kimning havasini keltiradi, qaragan odamning ko‘ngli yori¬shadi. Ayniqsa, bu erda kamalakrang jilolanadigan musiqali favvora ishga tushirilishi istirohat bog‘ining ko‘rki va chiroyini yanada oshirdi. «Yoshlar bog‘i» deb nomlangan mazkur maskanda rangbarang jilolanuvchi musiqali favvoraning ish boshlagani esa tuman aholisiga chinakam bayramona tuxfa bo‘ldi. Ayniqsa, kichkintoylar uchun shunday maskanlarda maroqli va mazmunli hordiq chiqarishning gashti o‘zgacha. Tuman hokimining bevosita tashabbusi bilan yangi tashkil etilgan «Yoshlar bog‘i» va musiqali favvora ana shu jihatlari bilan barchaga manzur bo‘lmoqda. Zamonaviy qulayliklarga ega yangi istirohat bog‘ining ishga tushirilishi istiqlol bergan imkoniyatlarning yorqin ifodasidir. Shuningdek, istirohat bog‘ida Yoshlar markazi binosining qurib foydalanishga topshirilishi, tuman yoshlari uchun haqiqiy yangilik bo‘ldi. Endilikda yoshlar ushbu markazda turli to‘garaklarga a’zo bo‘lishib bo‘sh vaqtlarini mazmunli o‘tkazish imkoniyatiga ega bo‘lishadi. Uch gektardan iborat bog‘da mingga yaqin manzarali daraxtlar ekildi. Yoshlar bog‘i va musiqali favvoraning ochilishi mustaqilligimizning yigirma ikki yilligi bayramiga tuhfa bo‘ldi. Istirohat bog‘ining ochilishi marosimi ham ko‘tarinkilik ila o‘tkazildi. Bog‘ning ramziy kaliti Kamolot YoIH Payariq tuman Kengashi raxbariga tantanali suratda topshirildi. Qayd etish joiz, istiqlol bergan keng imkoniyatlar tufayli Payariq tumanida ham aholi farovonligi, uning real daromadlarini oshirish, bandlik masalalarini echish, qishloqlarda kichik biznesni rivojlantirish, oilaviy tadbirkorlikka keng sharoit yaratish va tegishlicha ko‘mak berish maqsadida e’tiborga molik ishlar amalga oshirilmoqda. Musiqali favvoraning bunyod etilishida texnika fanlari doktori, professor O‘tkir Soatov va quruvchi Shavkat Rayimqulovlar boshchiligidagi ishchi – xizmatchilar uch oy davomida jonbozlik ko‘rsatdilar. Loyiha muallifi esa Samarqand arxitektura va qurilish institutining magistranti Akmal Soatovdir. Favvora mustaqillik bayramiga tumanlik aholi uchun ajoyib tuhfa bo‘ldi. Darhaqiqat, so‘lim gulzoru yashil maysazorlar, musiqali favvora bog‘ning ko‘rkiga ko‘rk qo‘shishi bilan birga, yozda harorat mo‘‘tadilligini ta’minlashga ham xizmat qiladi. Favvoraning xususiyati shundaki, ashula va musiqa sadosi suvning mavjlari bilan hamohang bo‘ladi. Uning suv hajmi 30 metr kub, diametri 13 metr. Favvora atrofida zamonaviy chiroqlar o‘rnatilgan bo‘lib ular 27 xil rangda jilolanadi. Mumtoz va zamonaviy ashulalarga hamohang tarzda ko‘kka ko‘tarilayotgan shalolar kamalak misol nur sochmoqda. Uning atrofida sho‘x-shodon o‘ynab yurgan bolajonlar quvonchi esa bir olam. Shuni alohida ta’kidlash joiz, bugun Payariq tumanining Chelak shaharchasida ham istirohat bog‘i bir paytning o‘zida obodonlashtirilmoqda. Mazkur obe’ktlarda olib borilayotgan qurilish-bunyodkorlik hamda obodonlashtirish ishlariga homiy tashkilotlar hamda tadbirkorlar tomonidan 5 mlrd sumga yaqin mablag‘ jalb qilingan. «Yoshlar bog‘i» oilalarning sevimli dam olish maskani hamda bolalar va yoshlar uchun turli madaniy-ma’rifiy tadbirlar o‘tkaziladigan joyga aylanadi. Hozirda «Yoshlar bog‘i»ga xorijdan zamonaviy attraksionlar keltirilib o‘rnatilmoqda.

Samarqandlik arxitektor qiz...

Ayni kunlarda respublikamiz bo‘ylab Fund Forum va Kamolot yoshlar ijtimoiy harakati tomonidan tashkil etib kelinayotgan kelajak ovozi tanlovining viloyat bosqich g‘oliblarini taqdirlash marosimlari bo‘lib o‘tmoqda.

Samarqan viloyatidan respublika bosqichiga yo‘llanma olgan yoshlar orasida Dildora Begmatova ham bor. Yosh arxitektorning taqdim etgan loyihasi ham zamonaviy shaharsozlik mavzusini o‘z ichiga olgan. Biz ushbu yosh arxitektor qizga kelgusidagi ishlariga ulkan muvafaqqiyatlar tilab qolamiz.

Tanlov bo'lib o'tdi.....

Samarqand shahrida "Kelajak ovozi – 2013” ko‘rik-tanlovining viloyat bosqichi g‘oliblarini taqdirlash marosimi o‘tkazildi."O‘zbekiston madaniyati va san’ati forumi” jamg‘armasi tomonidan "Kamolot” yoshlar ijtimoiy harakati, Oliy va o‘rta maxsus ta’lim vazirligi bilan hamkorlikda tashkil etilgan "Kelajak ovozi” respublika ko‘rik-tanlovining viloyat bosqichi yuqori saviyada tashkil etilib, unda 6500 nafardan ziyod yigit-qiz qatnashdi.

Tanlovning saralash bosqichlarida arxitektura va dizayn, axborot texnologiyalari, ratsionalizatorlik takliflari va texnik ishlanmalar, an’anaviy va amaliy san’at, badiiy ijod va publitsistika yo‘nalishlarida g‘olib bo‘lgan 1000 nafarga yaqin yoshlar viloyat bosqichida yana bir bor sinovdan o‘tdi. Ular orasidan 45 nafar ishtirokchi tanlovning mamlakat bosqichida qatnashish huquqini qo‘lga kiritdi. Tadbir doirasida yoshlar uchun bo‘sh ish o‘rinlari yarmarkasi ham o‘tkazildi. Unda Samarqand shahridagi o‘ttizga yaqin korxona va tashkilot uch yuzdan ortiq bo‘sh va kvota ish o‘rinlarini taklif etdi. Viloyatdagi oliy o‘quv yurtlari va kasb-hunar kollejlari bitiruvchilaridan 160 nafarga yaqini shu erning o‘zida korxonalar bilan shartnoma tuzib, ishga yo‘llanma oldi 

"Sharq taronalari" haqida 10 fakt

Shu kunlarda Samarqand shahrida "Sharq taronalari" 9-xalqaro musiqa festivali bo‘lib o‘tdi. Unda jahonning 50dan ziyod mamlakatlaridan san’atkorlar ishtirok etdi.

1.       Samarqanddagi Registon maydonida 1997 yildan buyon har ikki yilda bir marotaba o‘tkazib kelinayotgan "Sharq taronalari” xalqaro musiqa festivali 25-30 avgust kunlari to‘qqizinchi bor nishonlandi.

2.      YUNESKO ishtirokidagi tashkil etiladigan ushbu yirik musiqa tadbirida bu yil 50dan ziyod mamlakat vakillari qatnashdi. Ilk bor o‘tkazilgan musiqiy festivalda 31 davlat vakillari qatnashgan bo‘lsa, 2011 yilga kelib ishtirokchi davlatlar soni 56 taga etdi. 2013 yilgi festivalda ishtirok etish bo‘yicha eng ko‘p so‘rov Hindistondan tushgan bo‘lib (26ta), Erondan 13ta, Ozarbayjondan esa 5ta ariza kelgan.

3.      Festival dasturidan an’anaviy vokal va milliy an’anaviy instrumental musiqa bo‘yicha ijrochilik mahorati tanlovlari o‘rin olgan. Bundan tashqari, festival doirasida Sharq musiqa an’analariga bag‘ishlangan xalqaro ilmiy konferensiya o‘tkazildi.

4.      "Sharq taronalari”da raqqosalar chiqishi baletmeyster va pedagog Mukarrama Turg‘unboevaning 100 yillik to‘yiga bag‘ishlandi. Bosh baletmeyster, O‘zbekiston xalq artisti Ravshanoy Sharipovaning ma’lumot berishicha, konsert dasturida Farg‘ona, Navoiy, Samarqand viloyatlari hamda Toshkent davlat milliy raqs va xoreografiya oliy maktabidan eng iqtidorli va mahoratli to‘rt yuzga yaqin raqqosalar taklif etildi.

5.      Konsert dasturiga O‘zbekiston xalq artisti Bahodir Yo‘ldoshev rejissyorlik qildi. Festivalning ochilish marosimida elimizning ardoqli san’atkorlari, O‘zbekiston xalq artistlari Munojot Yo‘lchieva, Beknazar Do‘stmurodov, Zulayho Boyxonova, Ozodbek Nazarbekov, O‘zbekistonda xizmat ko‘rsatgan artistlar Gulsanam Mamazoitova, Alisher Fayz, Malika Egamberdieva µamda milliy va estrada yo‘nalishida ijod qilayotgan boshqa xonandalar ishtirok etishdi.

6.       Shahardagi muzeylar, milliy hunarmandchilik markazlari yangi ekspozitsiyalar bilan boyitildi. Festival kunlari milliy cholg‘u asboblar ko‘rgazmasi hamda tarixiy liboslar namoyish etildi.

7.      Festival doirasida yosh ijodkorlar, san’atshunos olimlar va tadqiqotchilar ishtirokida Sharq xalqlari musiqa merosiga oid ilmiy anjuman ham o‘tkazildi.

8.     To‘qqichinchi bor o‘tkazilayotgan "Sharq taronalari” musiqa festivali ishtirokchilari: Gohar Oganesyan — Armaniston, "Shirvan” mugam guruhi — Ozarbayjon, Triinu Taul, yakkaxon xonanda — Estoniya, Sayak Barua, yakkaxon sozanda — Hindiston, "Kerulen” guruhi — Qozog‘iston, "Assurd” guruhi — Italiya, Xitoy Milliy opera va raqs drama teatr orkestri — Xitoy, "Sorixuyun Kayagim Byungchangdan” guruhi — Janubiy Koreya, "Diyuta” guruhi — Litva, "Takideda” kvartet — Madagaskar, Sanam Marvi– yakkaxon xonanda — Pokiston, Ana Alkaide — Ispaniya, "Katch Pop String-Strong”Duet — Avstriya-Serbiya, "Bangladesh Shilpakala Akademiyasi” guruhi — Bangladesh, Milliy folklor dastasi — Misr, "Astrodjorjiya” guruhi — Gruziya, Rashmi Agarval – xonanda — Hindiston.

9.      Festival tashkilotchilari "Sharq taronalari” xalqaro musiqa festivalining asosiy ta’sischilari quyidagi tashkilotlar hisoblanadi:

O‘zbekiston Respublikasi Madaniyat va sport ishlari vazirligi;

"O‘zbeknavo” estrada-birlashmasi;

O‘zbekiston Milliy teleradiokompaniyasi;

O‘zbekiston Bastakorlar uyushmasi;

Samarqand viloyati hokimligi.

10.  Tanlov g‘oliblari uchun Festival tashkiliy qo‘mitasi tomonidan quyidagi mukofotlar ta’sis etilgan:

Gran-Pri – 10.000 ming AQSH dollari;

1 - mukofot (2 ta) har biri 7.000 AQSH dollaridan;

2 - mukofot (2 ta) har biri 5.000 AQSH dollaridan;

3 - mukofot (2 ta) har biri 3.000 AQSH dollaridan.

Ijodiy uyushmalar, jamg‘armalar, xalqaro va boshqa tashkilotlar maxsus mukofotlarini ta’sis qilishlari mumkin. Tanlovning har bir ishtirokchisiga maxsus diplomlar topshirildi.